Споени концесии на Еуромакс за рудникот кај Иловица и Штука, активисти најавуваат мобилизација

Во Службен весник од 4 јули е објавена одлука за спојување на две концесии на Еуромакс за експлоатација на минерална суровина на локалитети во општините Босилово и Ново Село.

„Во последниот број на Службен весник на Република Северна Македонија, број 141 од 4 јули 2023 година, се објавени следните прописи: Одлука за спојување на концесијата за експлоатација на минерална суровина – руди на бакар и злато на локалитетот „с. Иловица“, Општина Босилово со концесијата за експлоатација на минерална суровина – бакар и злато на локалитетот „Иловица“, Општина Босилово и Општина Ново Село на Друштвото за производство, промет и услуги Еуромакс ресоурцес ДОО Скопје“, соопштија од Јавното претпријатие Службен весник на Република Северна Македонија.

Од Министерството за економија појаснуваат дека оваа одлука на владата е донесена на нејзината седница одржана на 27 јуни, а основ за нејзиното донесување е пресудата на Управниот суд од 30 март со која се уважува тужбеното барање на Еуромакс и оспорената одлука на владата од 16 декември 2019 година за едностран раскин на договорот за концесија за експлоатација на минерална суровина на локалитетот „с. Иловица“ во општина Босилово.

Од граѓанската организација „Здрава Котлина“ реагираа дека со одлуката за спојување на концесиите, која според нив е донесена тивко, отстранета е најголемата пречка за Еуромакс да добие дозвола за експлоатација. Тие најавуваат мобилизација на народот против отворање на овој рудник.

„Најавуваме дека народот активно ќе се мобилизира и ќе се самоорганизираме да делуваме на секаков можен начин! Никогаш нема да дозволиме никаков рудник никому!  И ние имаме чизми на таван! Многу чизми што многу време не се извадени… Време е за народна буна! Рудник нема да има!“, предупредуват од „Здрава Котлина“.

• Дознај повеќе: Протестна блокада на центарот на Струмица по владината одлука за спојување на концесии на Еуромакс за рудникот кај Иловица и Штука

„Дозвола за експлоатација нема да биде издадена и без претходни консултации и сослушување на ставовите на локалното население, што е и законски редовна постапка при издавање на решение за одобрување на студија за заштита на животната средина, без која не може да се издаде дозволата. И ова се однесува не само на дозвола за експлоатација во Иловица, туку и за отворање на било кој друг рударски капацитет во Република Северна Македонија“, велат од Министерството за економија.

Од компанијата Еуромакс која сака да го изгради и да работи со рудникот кај струмичките села Иловица и Штука на Огражден велат дека сите правни аргументи се на нивна страна и затоа очекуваат без нови одлагања да бидат усвоени сите одлуки неопходни за да започне реализацијата на проектот. Тие сметаат дека во 2020 година, кога се одржаа парламентарни избори, властите ја ставиле концесијата за рудникот „на дневно-политичка агенда“ и предупредуваат дека доколку „повторно се напаѓа владеењето на правото“ ќе ја тужат државата пред меѓународен суд.

„Еуромакс Ресоурсис останува доследна на принципот дека ќе ги исцрпи сите домашни правни механизми за да ја реализира инвестицијата со добра волја и чесни намери. Сепак, доколку увидиме дека на прашањето на нашата инвестиција повторно се напаѓа владеењето на правото како уставна загарантирана темелна вредност, тогаш ќе бидеме принудени да покренеме соодветна постапка пред Меѓународната арбитража во Вашингтон, САД. Првичните проценки се дека вкупните штети кои потенцијално ќе се наплатат од Буџетот на Северна Македонија изнесуваат повеќе од 1 милијарда евра, без пресметани камати“, предупредуваат од Еуромакс.