Од граѓанската организација „Здрава Котлина“ од Струмица најавуваат протестна блокада насловена „Заедно против рудникот“ која ќе се случи на 15 јули, сабота, со почеток во 11.00 часот. Активистите ќе протестираат на раскрсницата пред Градскиот трговски центар „Глобал“ во центарот на градот.
- Дознај повеќе: Споени концесии на Еуромакс за рудникот кај Иловица и Штука, активисти најавуваат мобилизација
Според „Здрава Котлина“, со одлуката за спојување на двете концесии на Еуромакс за експлоатација на минерални суровини на локалитети во општините Босилово и Ново Село, донесена од владата на 27 јуни, а објавена во Службен весник на 4 јули, на повидок е отворање на овој рудник на Огражден.
„Со последниот потег на корумпираните судови и Владата, рударските корпорации се на чекор да го отворат геноцидниот и екоцидниот проект, рудникот „Иловица–Штука“, велат од „Здрава Котлина“.
Тие ќе протестираат против оваа одлука на владата и предупредуваат дека нема да дозволат да се отвори рудникот за бакар и злато кај струмичките села Иловица и Штука на Огражден.
„Во знак на протест на неразумната одлука, ве повикуваме сите заедно да го изразиме нашиот револт за да ја одбраниме Струмичката Котлина, нејзините животоносни продукти, а со тоа и цела Македонија, од алчните злосторници и нивните соработници, кои со отворањето на рудникот, подмолно и беспоштедно сакаат да ни ги отрујат трите основни извори за живот: водата, почвата и воздухот! А тоа води до трајно исселување од нашите огништа и засекогаш да ја напуштиме нашата котлина преполна со живот“, стои во соопштението на „Здрава Котлина“ објавено денеска.
