![almak](https://strumicanet.com/wp-content/uploads/2025/08/srnet-banner-аugust2025-optimized.jpg")
Мал беше просторот во Градската уметничка галерија да прими толку многу народ, љубители на ликовната уметност, пријатели, колеги, ученици на професорката Љупка Галазка Василев. Мал беше и просторот да се постават сите нејзини дела на ѕидот, ги имаше само 40-тина од многуте дела создадени од уметницата Љупка Галазка Василев.
На отворањето на изложбата насловена „Лирски трепети“, професорката Ана Витанова Рингачева кажа дека сликите на Љупка Галазка Василев егзистираат во еден засебен свет, ограден со бршлен и сокриен од сета врева и бркотница на надворешниот свет и дека таа е уметница чии дела се одраз на една лирска импресија, што целосно се претопува со нејзината совршено смирена природа.
„Расткајувајќи ги старите етно мотиви, уметницата ги пресоздава во форми што совршено се вклопуваат во современиот екстериер, така вдахнувајќи им нов живот. Нивната слеаност со боите и формите на сликата, се надоврзува на тенката срмена романтичарска нишка, која емитува необјаснива топлина. Топлата панорама на пределот со нагласена лирска интонација, создава привид на ненаметлива градација на бои, што раѓаат чувство на спокој. Вжарениот пејзаж на средлетна омарнина, создава привид на хармонија меѓу земното и небесното. Набљудувањето на нејзините дела, значи смирен и зауздан интензитет на доживување, состојба што е во целосна спротивност од забревтаноста на светот во кој живееме“ – кажа Витанова Рингачева.
За ликовниот уметник Никола Пијанманов сликарството на Љупка Галазка Василев личи на ткаење.
„Структурата во нејзините слики е сошиена за композицијата и во неа дури и кога не се видливи формите, сликите имаат свое значење. Симбол на нешто сокриено во распоредот на боите и површините. Како старите килими на нашите предци. Тие се топли и полни со значење иако не можеме да ги одгатнеме нивните тајни. Можеби е тоа интуитивно спознание или пак некоја апстрактна шема за чиј распоред знае само авторот. Како лавиринт од боја, цртеж и колаж. Или поточно како големо и широко поле во кое секое парченце земја го има своето неповторливо индивидуално значење“ – истакнува Пијанманов.
Авторката Љупка Галазка Василев обраќајки и се на публиката ја потенцира поддршката на Општина Струмица за поставувањето на оваа изложба, но и на голем број пријатели кои помогнаа во нејзината организација и реализација. Изложбата „Лирски трепети“ во Градската Уметничка галерија ќе биде отворена и во наредните десеттина дена.
