Фондацијата „Заев – Едно општество за сите“ испрати 22 тони конзервирана храна за настраданите во Турција

Фондацијата „Заев – Едно општество за сите“, брендот „Мамас“ и компанијата „Тотал Инжинеринг“, испратија хуманитарна помош за турскиот народ наменета за граѓаните од регионите погодени од катастрофалниот земјотрес во Турција.

Станува збор за 22 тони разновидна конзервирана храна, која со обезбеден донаторски транспорт (камион-шлепер) од „Сакаов Транс“ – Струмица, е испратена до градот Едрене, од каде ќе биде дистрибуирана до погодените подрачја.

Тие како донатори, упатија јавна благодарност до вработените во турската амбасада во Република Северна Македонија, за одличната соработка и помошта околу спроведувањето на сите процедури, неопходни за непречено испраќање на хуманитарната помош.

„Сочувствуваме со нашите пријатели, особено со семејствата кои изгубија свои ближни и останаа без своите домови. Се молиме за сите кои поминаа низ агонијата, а на повредените во земјотресот им посакуваме побрзо оздравување и враќање во нормалните текови на живеење. Да останеме луѓе, да останеме пријатели, но никогаш, ама баш никогаш и никаде низ светот, да не се случи тоа што се случи на турскиот и сирискиот народ“, стои во соопштението од Фондацијата „Заев – Едно општество за сите“.