Турскиот амбасадор во Македонија, Хасан Мехмет Секизќок ја посети општината Василево

Турскиот амбасадор во Македонија, Хасан Мехмет Секизќок беше во посета на општина Василево каде имаше средба со градоначалникот Славе Андонов.

Како што информираат од општината, на средбата која започна во кабинетот на градоначалникот, во пријателска атмосфера се разговарало за можностите за соработка со конкретизирање на прашања и проблеми во населените места каде што живее турско население, а кои бараат решавање. Амбасадорот Хасан Мехмет Секизќок изразил подготвеност за секаква соработка со Општина Василево и насочување на турските бизнисмени да инвестираат во руралниот развој.

„Посебен акцент на средбата беше ставен на економската соработка, која се потврдува и со сериозната заинтересираност на турски компаниии за инвестиции во индустриската зона во нашата општина. Информиравме за отвореноста на локалната самоуправа и поддршката која ја овозможува општината во рамките на својата надлежност и за развој на други бизнис идеи кои ќе придонесат за економско јакнење на општина Василево. По претставувањето на спецификите, особеностите, можностите и капацитетеите со кои располага општина Василево, како и отворено изразената воља за пријателство од наша страна, разговорот се водеше околу можностите за заедничка соработка во повеќе области и реализација на конкретни активности од кои бенефит би имале двете страни“ – изјави градоначалникот Андонов.

Средбата продолжила со посета на населените места Василево, Градашорци, Добрашинци, Нова Маала, Чанаклија, Висока Маала и Пиперево, каде амбасадорот со неговите соработници имаа заеднички средби со жители од турска националност. Заедно со претставници од стручните служби на општината ја посетија и Индустриската зона КО Градашорци.

Ова е втора средба на градоначалникот Андонов со амбасадорот Хасан Мехмет Секизќок и истата птретставува континуитет во соработката на Општина Василево со Амбасадата на Република Турција во Македонија.