Струмичките пожарникари се дел од обуката за прекугранична соработка на планината Пирин во Бугарија

Пожарникари од Противпожарната единица на Струмица, вчера и денеска учествуваат на заедничката обука на планината Пирин заедно со пожарникари и доброволци од Југозападниот регион во Бугарија.
„Гасење на шумски пожари и спасување жртви на терен“ е темата на оваа обука. Пожарникарите вториот ден го минуваат на терен со практични вежби и примери од оваа тематска единица која беше обработена од страна на Ралица Тодорова, сертифициран обучувач од Националната Асоцијација на доброволците во Република Бугарија и Главната Дирекција за пожарна безбедност и заштита на населението.
Пожарникарите и доброволците имаат можност во реални услови на планината Пирин да вежбаат реална ситуација на гаснење на шумски пожар и спасување на изгубени туристи за кои не е позната состојбата во која се наоѓаат. На вежбата се користи дел од опремата со која работи и располага Територијалната противпожарна единица на Банско.
Обуките се дел од имплементацијата на проектот за „Прекугранична соработка во справување со шумски пожари“, финансиран од Европската Унија преку Интеррег ИПА Програмата за прекугранична соработка помеѓу Република Бугарија и Република Северна Македонија 2014-2020, проект кој Центарот за развој на Југоисточниот плански регион, кој го спроведува во партнерство со Асоцијацијата на Југозападни општини, Благоевград, Република Бугарија.