Струмичкиот театар со „Циркусот…“ на 47-от МОТ – Млад отворен театар

Струмичкиот театар „Антон Панов“ од Струмица вечерва со претставата „Циркус Пирандело“ ќе настапи на 47-то издание на МОТ – „Млад отворен театар“, кој од 10 до 19 Ноември се одржува во Скопје.
„После 15 години повторно сме на овој престижен театарски фестивал, еден од најстарите и најреномираните во регионот“, вели директорката на НУЦК „Антон Панов“ и една од актерите во претставата „Циркус Пирандело“, Танкица Стојанова, додавајќи дека од 25-те пријавени на отворениот повик се најде и струмичката претстава селектирана меѓу осумте претстави во официјалната програма на овој фестивал.
„Млад отворен театар 2022“ е со интернационална програма, а ќе бидат изведени претстави на театри од Словенија, Грција, Турција, Велика Британија, Србија, Црна Гора и Македонија.
Инаку претставата „Циркус Пирандело“ во изведба на актери од струмичките театар е работена по текстови од Луиџи Пирандело, а во адаптација и режија на Бојан Трифуновски. Претставата вечерва на МОТ ќе биде одиграна во 20:00 часот во салата „Фросина“.