Струмичката гимназија „Јане Сандански“ го слави својот патрон

Вработените и учениците во Средното општинско училиште „Јане Сандански“ во Струмица, денеска одбележаа две значајни годишнини – 152 години од раѓањето и 109 години од смртта на патронот Јане Сандански.

„Борбата за совршенство, која нашиот патрон ни ја остави како аманет во еден од неговите најпознати цитати, претставува секојдневен предизвик за учениците и вработените во училиштето. Многу работи се случија меѓу два патронати. Освоивме многу награди, ја пуштивме во употреба новата спортска сала, реализиравме низа Еразмус проекти, организиравме прекрасен новогодишен концерт и најдобар кошаркарски турнир, го одбележавме Денот на лицата со попреченост, Денот на лицата со ретки болести, Денот на лицата со Даунов синдром, Меѓународниот ден на човековите права, го чествувавме името на професорка Елка Терзиева, имавме најдобра маска на карневалот, рецитиравме македонска поезија, и што ли уште не. Не застануваме тука“ – кажа во своето обраќање директорката на училиштето, Невенка Стојанова најавувајќи дека наскоро ќе биде ставена во употреба новата училишна читална, а повторно ќе биде организиран Турнир во мал фудбал.

По обраќањето на директорката Стојанова, беше положено свежо цвеќе пред бистата на Сандански во дворот на училиштето од страна на Општина Струмица, вработени во училиштето и Сојузот на борците во Струмица, а градоначалникот Костадин Костадинов, кој со своите соработници од Одделението за образование и дел од советниците во Советот на општината присуствуваа на одбележувањето на патронот, им го честита празникот и на учениците и на вработените, посакувајќи им многу успех во воспитно-образовниот процес и воннаставните активности.

По повод патрониот празник, училиштето организираше литературен конкурс на тема: „Татковината е се’ што имаме и се’ што има таа сме ние“, од кој беа избрани најдобрите. Првата награда ја освои ученичката Марија Чолакова, втората Катерина Трајкова, а третата награда Софија Трнковска.

ФОТОГАЛЕРИЈА