Струмичани ја имаа привилегијата премиерно да ги слушнат и да уживаат во изведбите на новите песни од првиот албум на Иван Кукиќ

Синоќа струмичани ја имаа привилегијата премиерно да ги слушнат и да уживаат во изведбите на новите песни од првиот албум на веќе познатиот млад кантавтор и мултиинструменталист, струмичанецот Иван Кукиќ кој со својата музика, свирење и пеење ја освојува публиката низ сите поранешни ЈУ републики.

Во рамките на „Струмица Опен фестивал 2024“ со концерт го промовираше својот прв албум „Sunday vibes“ во издание на дискографската куќа „Croatia Records“ од Хрватска, кој пред еден месец е веќе пуштен „во етер“.

Во малиот градски парк во Струмица, со свирка во живо во изведба на неговите колеги од „YU FOR YOU“, Иван ги отпеа десетте песни од овој албум, а засвири заедно и со познатиот соло гитарист од Струмица, Горан Алиќ и останатите членови на групата „Јупитер“, кои ја свират композицијата „Life of Jupiter“ во албумот на Иван.

Насловната „Sunday vibes” е со Влатко Стефановски, „Pružam ruke dve“ со Дадо Топиќ, „Music philosophy“ со Теодосии Спасов, „Zrno nade“ со Сакис Доволис и интересниот сингл „Balkan funk“ создаден со Џамбо Агушев и Јан Стефановски се композициите на кои свират и пеат овие познати имиња од естрадата во регионот.

Концертот беше и од хуманитарен карактер. Иван организираше донациски кутии на самиот простор во паркот за посетителите кои сакаат да донираат за Катерина Трајкова од Босилово на којa и е дијагностицирaно сколиоза. Операцијата е скапа, но со хуманите луѓе и нивната финансиска поддршка, Катерина ќе може да оди на операција.

ФОТОГАЛЕРИЈА