Полициски службеници од СВР Струмица вчера, околу 12:30 часот, во Струмица го лишиле од слобода О.В.(38) од Струмица, поради сомнение за извршување на кривични дела измама.
Според информациите од полицијата, осомничениот на 6 и 7 февруари годинава, во два наврати, учествувал во измами во кои биле оштетени 84-годишна и 68-годишна жителка на Струмица, додека во еден случај било спречено обид за измама на 77-годишна жителка на градот.
Како што информираат од СВР Струмица, едно лице телефонски ги контактирало жртвите на нивните фиксни телефонски броеви, претставувајќи се како медицинско лице и барајќи пари наводно за итна операција на нивна ќерка или снаа. По претходен договор, О.В. одел на локациите што му биле посочувани и ги преземал парите од оштетените.
При лишувањето од слобода, кај осомничениот биле пронајдени 15.150 евра и 50 швајцарски франци, за кои се сомничи дека се стекнати со извршување на кривичните дела. Лицето било задржано во Полициската станица Струмица, каде во службен разговор го признало начинот на извршување на делата.
За случајот е запознаен јавен обвинител од Основното јавно обвинителство Струмица, а по целосно документирање против осомничениот ќе биде поднесена соодветна кривична пријава.
Од СВР Струмица повторно апелираат до граѓаните да бидат внимателни при телефонска комуникација со непознати лица, да не наседнуваат на ваков тип измами, да ги проверуваат информациите што им се пласираат и да не даваат пари на непознати лица, како и сите сомнителни случаи навремено да ги пријавуваат во полиција.
