Стартува 4-то издание на маѓународниот фестивал на класична музика „Струмица 2025“

Вечерва од 20:00 часот во фоајето на Центарот за култура „Антон Панов“ во Струмица со концерт на пијано дуото „Гелебешеви“, стартува 4-то издание на „Класика меѓународен фестивал – Струмица 2025“.

„И оваа година, во еден од наjубавите месеци, повторно ќе уживаме во звуците на класичната музика, изведена од врвни уметници кои ни гостуваат на фестивалот. Со својата музичка магија, тие ќе го допрат ѕвезденото небо над Струмица, а нашата публика ќе има чест и задоволство да биде дел од тоа доживуванье. За ова издание, се потрудивме да поканиме извонредни уметници и камерни состави од различни земји и жанрови, со цел да jа збогатиме културната понуда и да jа привлечеме струмичката публика“ – вели Васил Атанасов, основач, селектор и еден од организторите на овој фестивал.

Фестивалот ќе се одржува до 10 јуни, а според програмата во фестивалските денови ќе настапат и квартет од Бугарија, флејта, виола, виолончело и контрабас, под водство на професорката Петја Багоска, камерното дуо од Чешка, Кристијан Бодаровски со певицата од Прашката опера, Павлина Сенич, хорот „Злата Мегленска“, саксофон квартет од Македонија, под раководство на професорот Горан Кавраков, кои ќе настапат со музика од Бах до филмска музика и обработки.

Концертите ќе се одржуваат во Центарот за култура „Антон Панов“ во Струмица и еден концерт во црквата „Св. Петнесет Тивериополски свештеномаченици“. Фестивалот е поддржан од Општина Струмица и Министерството за култура и туризам.