Спортската новинарска елита од Југоисточна Европа доаѓа во Струмица на Симпозиум, а ќе играт и фудбал во чест на Благој Истатов

Од вечерва во Струмица доаѓаат спортски новинари од Хрватска, Босна и Херцеговина, Унгарија, Србија, Црна Гора, Бугарија, Грција, Кипар, Албанија, Турција и од земјата домаќин Македонија и ќе учествуваат на Симпозиумот „Спортот за државата – државата за спортот“, кој во организација на Асоцијацијата на спортски новинари на Македонија, утре и во петок (3 и 4 Ноември), ќе се одржува во хотелот „Сириус“ во Струмица. На Симпозиумот ќе учествуваат и потпретседателот на Светската Асоција на AIPS, Јанис Дарас, генералниот секретар на AIPS, Јуре Озмец, како и членови на Бордот на Европската асоцијација на спортски новинари.
Првиот ден ќе биде во духот на спортот преку игра, односно одржување на турнир насловен „Отворен спортски Балкан“ на кој ќе играат спортски новинари од Македонија, Босна и Херцеговина, Србија и Црна Гора. Почетокот е закажан во 09:30 часот на стадионот „Благој Истатов“ во Струмица, а по кратките натпревари во 12:30 часот учесниците ќе го посетат вечното почивалиште на легендата на македонскиот и струмичкиот фудбал, голманот Благој Истатов на Градските гробишта во Струмица. Финалните натпревари ќе се одиграт попладне од 14:30 часот.
На Симпозиумот во петок, ќе бидат доделени златни плакети за мир на Васил Тупурковски, Зоран Заев и Алексис Ципрас, по што ќе следуваат обраќањата на говорниците на пет теми: „Мир“, „Спорт“, „Здравје“, „Младост“ и „Радост“.
Симпозиумот завршува вечерта со забава на која ќе бидат доделени и пехарите на победниците од турнирот посветен на Благој Истатов, како и доделување плакети и признанија на истакнати спортисти и спортски работници заслужни за развојот и унапредување на спортот во Македонија.
Учесниците во овие два дена ќе имаат можност да ги посетат и културно-историските обележја, како и туристичките места во струмичкиот регион.