Споменикот „Струмин гроб“, кој се наоѓа кај струмичкото село Баница, ќе биде преместен во идниот парк во новата градска населба „Карпош“ – поранешната касарна. Оваа одлука произлегла од втората сесија на Буџетскиот форум на општина Струмица, која се одржа вечерва во новоизградениот Младински центар во зградата на општината. Одлуката е на барање на граѓани, кои се пожалиле дека овој споменик денес се наоѓа на приватен, а не јавен имот, и е недостапен за посетители.
Инаку, овој споменик е посветен на легенда за Струма, ќерка на струмички средновековен словенски заповедник, која била бескрајно вљубена во еден византиски војсководец кој дошол да ја освои Струмица. Наоѓајќи се на висок и стрмен рид, струмичката тврдина, позната како „Цареви Кули“, била тешко освоива. Струма му го открила на византискиот војсководец тајниот пат до „Цареви Кули“. Кога дознал за ова предавство, татко ѝ на Струма ја проколнал кога ќе умре земјата девет пати да ја исфрла од гробот. Според легендата, така и се случило и затоа оваа градба во Баница е форма на девет слоеви.
Со преместувањето на „Струмин гроб“, споменикот заснован на легенда во која се инкорпорирани елементи од историјата на Струмица ќе биде достапен за посетителите на новиот парк.
На вечерашната форумска сесија присутните граѓани како приоритети за реализација во 2024 година ги избраа проектите: Изградба на нов градски пазар, како прв со најмногу гласови, Реконструкција на Домови на културата и како трет дислокацијата на Струмин гроб.
