Во согласност со член 52, став 5 од Законот за локална самоуправа, градоначалникот на општина Струмица, Петар Јанков го именуваше советникот Владимир Ристов за заменик на градоначалникот. Со ова именување, Ристов ќе го заменува градоначалникот во случаи на негова спреченост или отсуство, обезбедувајќи континуитет во работењето на локалната самоуправа и непречено реализирање на активностите и надлежностите на општината.
Владимир Ристов, по професија правник е активен општествен и политички дејател во Струмица, кој во моментов го остварува својот втор мандат како член на Советот на општина Струмица. Познат е по својот конструктивен пристап, транспарентна комуникација со граѓаните и ангажманот во креирањето и поддршката на развојни политики за општината.
Во изминатите години, Ристов се истакна како еден од советниците со активен придонес во работата на советничките комисии, особено во областите поврзани со локалниот економски развој, културата и подобрување на условите за живот во општината. Тој во претходниот состав статистички беше најактивниот советник – со најголем број дискусии, предлози, учество во точки од дневниот ред. Неговиот ангажман често се поврзува со иницијативи за инфраструктурни подобрувања, поддршка на образовни активности и унапредување на јавните услуги.
Инаку, според Законот за локална самоуправа градоначалникот на општината определува лице од редовите на Советот кое ќе го заменува во случаи на негова спреченост или отсуство.
