![almak](https://strumicanet.com/wp-content/uploads/2025/08/srnet-banner-аugust2025-optimized.jpg")
„Противпожарната единица – Струмица е опремена и поседува модерна противпожарна опрема со која можеме да се справиме со сите видови на пожари како и спасување и извлекување на лица од различни катастрофи и несреќи. Нашите пожарникари ги ценат заложбите и настојувањата на надлежните служби кои ни ја обезбедуваат потребната опрема со кој се доближуваме до највисоките професионални стандарди во извршувањето на нашите секојдневни задачи“ – кажа во своето обраќање командирот на Територијалната Професионална Противпожарна единица во Струмица, Александар Гудев на денешната свеченост по повод 20 Мај – Ден на пожарникарството во Македонија.
Скромно, но со дефиле и вклучени сирени на противпожарните возила низ улиците на Струмица, пожарникарите во кругот на Противпожарната единица го одбележаа Денот на пожарникарството. Имаа свечена смотра, а во своето обраќање градоначалникот на Струмица, Костадин Костадинов им кажа дека сите струмичани, но и граѓаните од од другите соседни општини, треба да бидат горди и благодарни на нив, затоа што тие, како најголеми непријатели на огнот, се најголеми пријатели на граѓаните.
„За да се биде пожарникар не е доволно само да се биде облечен во пожарникарска униформа. Да се биде пожарникар потребно е под таа униформа да чука едно големо срце исполнето со многу љубов кон професијата, многу љубов кон општината и многу љубов кон своите сограѓани“ – кажа градоначалникот Костадинов.
По повод Денот на пожарникарството, командирот Александар Гудев на институции и поединци со кои соработуваат им додели благодарници во знак на поддршка на нивната секојдневна работа.
Инаку, на 20 Мај 1836 година после катастофалниот пожар што го зафати градот Битола, со повелба на Румелискиот валија е формирана првата организирана противпожарна служба на овие простори. Од тогаш тој ден се смета за Ден на пожарникарството во Македонија.
