![almak](https://strumicanet.com/wp-content/uploads/2024/11/srnet-banner-noe-2-optimized.png")
По утринската Света Божествена Литургија, денеска од пред Црквата „Свети Димитриј и Свети Григориј Палама“ иконата на Пресвета Богородица Брзопослушничка, која вчера беше изнесена од Црквата „Свети Петнаесет Тивериополски свештеномаченици“, продолжи со свечена литија низ улиците на Струмица до плоштадот „Гоце Делчев“.
Пред поголем број верници на плоштадот се одржа молитвословие, а во присуство свештениците на Струмичката Епархија, поздравно слово одржа Викарниот епископ Јаков Стобиски.
„Таа е несогорливата капина која Мојсеј ја виде на Синај и која што гореше, а не согоруваше и тој вчудоневиден се собу бос и стоеше пред таа тајна, а ние созерцаваме и учествуваме во неа, заради тоа што гледаме дека Христос е пламенот кого што таа го прими и не ја изгоре“, кажа епископот Јаков.
Верниците освен на иконата на Пресвета Богородица Брзопослушничка се поклонуваа и пред светите мошти на Св. Василиј Велики и Св. Првомаченик Стефан.
По свеченоста, иконата беше вратена и оставена во Црквата „Свети Димитриј и Свети Григориј Палама“ за поклонение на верниците во наредните денови, а потоа пак ќе биде вратена во „Свети Петнаесет“.
Во март 2017-та година, од Света Гора, иконата беше донесена во манастирот „Светите Петнаесет Тивериополски свештеномаченици“, како подарок на градот Струмица од светиот игумен на Свештената Обител Дохијар, Старец Григориј со своето во Христа братство, во знак на спомен на чудото што Пресветата Владичица наша Богородица го направила во 2016-та година над 18-годишно немо момче од Струмица, враќајќи му го говорот во целост.
