Во Домот на културата „Јане Сандански“ во Ново Село во четвртокот беше промовирана монографијата „Раскази од Пирго — монографски приказ на општина Ново Село“, прво печатено дело кое ги собира сите релевантни информации за општината на едно место, претставувајќи ги нејзините економски и туристички потенцијали и природното и културно-историско наследство. Главен и одговорен уредник е авторот Петар Трајков од Струмица, делото визуелно е збогатено со фотографиите на младите Благој и Филип Костов, а рецензент на монографијата е историчарот Васил Ѓоргиев – Ликин.
„Мотив да се состави актуелниов монографски приказ на Ново Село е предизвикот да се направи опфат на сите податоци кои можат да бидат користени во унапредувањето на Ново Село со регионот. Да се забележат сите природни, демографски и стопански потенцијали, потоа да се воочат промените и да се дејствува во насока на зачувување на природната и еколошката средина, да се искористи целокупниот стопански потенцијал и да се промени правецот на тенденцијата на демографскиот фактор“, стои во монографијата.
Праисториските керамички садови, орудијата од камен и кремен и другите остатоци од периодот на неолитот откриени на наоѓалиштата Сушица во Ново Село и Голема Трпеза во атарот на Старо Коњарево и датирани во седмиот милениум пред нашата ера, како и остатоците од населба од бакарната доба откриена на наоѓалиштето Селиште во подножјето на Огражден, се најстарите траги кои сведочат за древната историја на територијата на денешната општина Ново Село. Историските сведоштва и археолошките остатоци ја оцртуваат историјата на регионот од антиката низ средниот век до денешницата.
Освен географијата и историјата на општината, монографијата ги разгледува и нејзините потенцијали — географската предност на општината како погранична со две земји од Европската унија, историското значење кое може да се претвори во туристички потенцијал, раскошните природни знаменитости, како заштитените Смоларски и Колешински водопади, кои претставуваат потенцијал за развој на рурален туризам, културниот живот, економските потенцијали во општината во областа на земјоделието, но и во индустријата, како и улогата на локалната самоуправа во развојот на регионот. Сегментот насловен „Селата како бисери“ е посветен на претставување на секое од населените места во општината.
