Пуштена на користење памп патека – стартуваше тридневен фестивал на велосипедизмот

Струмица доби памп патека, велосипедското-рекреативното игралиште кое се наоѓа спроти спортскиот комплекс на Горан Пандев. Од синоќа и официјално е пуштено во употреба како дел од рекреативните велосипедски содржини во Струмица. Со ова стартуваше Фестивалот „Вело Струмица“, второ издание на кое во наредните три дена ќе се реализираат неколку активности посветени на сообраќајната и велосипедската култура, а во насока на дополнување на „Струмица – Паметен Вело град“, во чии рамки во изминатата година беа изградени и обележани градски велосипедски патеки.

„Со досега воспоставената велосипедската инфраструктура, како и преку развојот на рекреативните велосипедски содржини како памп патеката, континуирано вложуваме во развојот за Европска, прогресивна Струмица. Чекор напред е креирањето на велосипедското-рекреативното игралиште зад мене – памп патека, мулти-функционални простори кој придонесува за прогресивни локални заедници“ – кажа на официјалното отворање на ова игралиште градоначалникот Костадин Костадинов, најавувајќи дека предвидена е и изградба на планински велосипедски патеки, како и развој на велосипедска инфраструктура која има за цел поврзување на населените места со градот.

Синоќа се направи и една Вело тура низ новите велосипедски патеки во градот. Возеа активни велосипедисти, рекреативци, а велосипед возеше и градоначалникот Костадин Костадинов.

За утре, како дел од програмата на фестивалот „Вело Струмица 2023“ ќе се реализираат три настани. Од 11:00 до 13:00 часот во големиот градски парк ќе се одржи „Вело Арт“, и во истиот термин на Вело патеката во паркот ќе се одржи „Баланс трка“, а од 13:00 до 15:00 часот на новата памп патека ќе се одржи „Вело родео“.

Во сабота, на светскиот Ден на велосипедот – 3 јуни во Амфитеатарот ќе се реализираат уште три едукативни настани. Од 17:00 до 18:00 часот Вело работилница – Одржување на велосипед со Ненад Ставровски, од 18:00 до 19:00 часот Вело едукација – Биди безбеден со Миле Стојменов и од 19:00 до 20:00 часот – Вело животен стил со Даниел Трбогазов.