Просветните работници и бизнисмени дебатираа за унапредување на средното стручно образование во општина Струмица

„Учи паметно, работи стручно“ – на ова тема денеска во Домот на АРМ во Струмица директори и наставници од струмичките училишта, советници, претставници на бизнис заедницата, дебатираа и меѓусебно споделуваа информации за унапредување на средното стручно образование во општина Струмица, за реформите кои се во насока на унапредување на стручното образование, со цел обезбедување на квалификувани кадри и можност за вработување на младите веднаш по завршувањето на средното образование.

Во минатата учебната 2021/2022 година во средните општински училишта во Струмица беа воведени шест дуални паралелки, по три во СОУ „Никола Карев“ и СОУ „Димитар Влахов“. Во тековната учебна 2022/2023 година, беа воведени седум дуални паралелки, од кои една во СОУ „Јане Сандански“ и по три во СОУ „Никола Карев“ и СОУ „Димитар Влахов“.

„Општина Струмица дава поддршка на активностите на Министерството за образование и наука, кои се во функција на спроведување на кампањата „Учи паметно, работи стручно“ која од оваа година е трансферирана на локално ниво. Во рамките на тие активности Општина Струмица ги зема во предвид потребите на компаниите, па согласно таквата практика, поголем дел од нив стануваат дел од предлог-плановите за запишување на ученици во прва година во средните училишта во нашата општина. Како резултат на тоа, се повеќе расте интересот од страна на учениците за запишување во дуалните паралелки“ – кажа Танкица Митрева, член на Советот на општина Струмица.

Од Општина Струмица најавија дека за наредната учебна 2023/2024 година се предлага воведување на една нова дуална паралелка во економската струка, профил економски техничар во СОУ „Јане Сандански“ и една во здравствената струка, профил болничар-негувател во СОУ „Димитар Влахов“.