Премиерот Ковачевски при денешниот престој во Струмица посети и два капитални објекти во изградба

Премиерот Димитар Ковачевски при денешната посета на Струмица, а по повод отворањето на новата Детска градинка „Виножито“, ги посети и местата каде се градат двата капитални објекти во градот Струмица, мостот „Обединување“ и идната станбена населба за сместување и домување на социјално загрозени семејства.
„Мостот „Обединување“ на реката Водочница кои за три месеци имаат реализација од 50% се гради со пари од буџетот на општина Струмица во износ од 30 милиони денари и е главен предуслов за реализација на уште поголем проект, а тоа е изградбата на булеварот „Братство Единство“ со кој отвораме ново грло во градот“, го информираше градоначалникот Костадин Костадинов на премиерот Ковачевски.
На увидот и на градежните активности од првата фаза од изградбата на станбената населба за сместување и домување на социјално загрозени семејства, градоначалникот Костадинов го запозна премиерот Ковачевски со завршените подготвителни активности, но и со фазите на изградба кои ќе следуваат во иднина.
„Исклучително сум среќен и бескрајно задоволен од позитивните реакции на премиерот за овој капитален проект, со надеж дека Владата финансиски ќе ја помогне неговата реализација. Вака, на дело покажуваме како се имплементира нашата социјалдемократска филозофија, за еднакво општество за сите. Ова социјална населба значи унапредување и подобрување на условите за живот на една социјална категорија граѓани на Струмица“ – кажа Костадинов.
Премиерот Ковачевски со домаќинот, градоначалникот Костадин Костадинов ја посетија и Фабриката „МАКС“, препознатлив македонски бренд кој повеќе од 30 години со широката палета на производи го зачинува нашето задоволство во храната.
Вечерва од 20:00 часот премиерот Димитар Ковачевски ќе присуствува и на граѓанската трибина во Спортската сала „Парк“ во Струмица што ја организира ОО на СДСМ Струмица, а на која свое обраќање, покрај премиерот како претседател на СДСМ, ќе имат и Костадин Костадинов, член на Извршниот одбор на СДСМ и Борче Цветков, претседател на струмичките социјалдемократи.kovacevski_kostadinov