![almak](https://strumicanet.com/wp-content/uploads/2025/04/srnet-banner-sofa-bed-garnituri-2025-optimized.jpg")
Почнува карневалското празнување во Струмица, годинава 35 години организирана форма на Струмичкиот карневал, која е вековна традиција на струмичани.
Интернационалното карневалско дефиле ќе се одржи на 1 март (сабота), низ улиците на Струмица. Претходната вечер е Маскенбалот со избор на принц и принцеза, збогатен со карневалистите од странство кои ќе се претстават пред маскираните струмичани.
Утре, среда 26 февруари ќе почне карневалската недела. Градоначалникот на Струмица, Костадин Костадинов во 18:00 часот ќе им го предаде клучот од градот на карневалистите и со тоа една недела тие „ќе управуваат“ со градот, а веднаш потоа (19:00 часот) во Градската Уметничка галерија ќе биде отворена изложба „35 години од обновената организирана форма на Струмичкиот карневал“. Во 19:30 часот во НУЦК „Антон Панов“ ќе биде поставена изложба на карневалските маски на СОУУД „Димитар Влахов“ од Струмица.
„Концертот под маски“ на Музичкото училиште „Боро Џони“ по 15-ти пат ќе се одржи на 27 февруари (четврток), со два концерти, во 18:00 и 20:00 часот. Маскенбалот е во петок во хотелот „Сириус“.
По главната карневалска вечер, недела на Прочка од 11:00 часот е Детскиот карневал. Следниот ден Чист понеделник, со варење бел грав на плоштадот во Струмица и делење ручок во 13:00 часот, а претходно во 12:00 часот ќе бидат објавени наградените карневалски маски. Истиот ден во 19:30 часот ќе биде отворена изложба од 26-от Меѓународен фестивал за афоризам и карикатура „Струмица 2025“ и ќе бидат доделени наградите на најдобрите творби.
На традиционалниот ден на Струмичкиот карневал, во вторник од 18:00 часот ќе се одржи традиционалното Карневалско корзо со наградените карневалисти, а во 19:00 часот доделување на наградите на најдобрите карневалски маски од годинашното издание.
Во среда се тримерските празнувања, односно во 12:00 часот во Центарот за култура ќе има тримерски ручок и мал концерт на „Распеани Струмичани“, а во 13:00 часот ќе му биде вратен клучот од градот на градоначалникот со што завршува карневалската недела во Струмица.
На Струмичкиот карневал 2025-та ќе се претстават 34 карневалски групи и една поединечна маска со вкупно 1058 учесници од Македонија, Хрватска, Србија, Црна Гора и Бугарија, а најмногу ќе бидат струмичките карневалисти, секогаш со своите креативни и атрактивни маски.
