Струмица во наредните четири дена ќе пулсира во знакот на филмската уметност. Почна „Астерфест“ на кој 23 кратки играни филмови, документарци и анимации ќе се прикажуваат секоја вечер од 20:30 часот на отворено под ведро небо во струмичкиот Амфитеатар и сите ќе се натпреваруваат за златна, сребрена и бронзена „Потковица“, како и за неколку други награди што ги доделува овој реномиран меѓународен филмски фестивал.
Градоначалникот на Струмица, Костадин Костадинов го означи почетокот на годинашното 18-то издание на „Астерфест“.
„Да имаше фестивалот човечки особености, тогаш вечерва ќе ја славевме неговата полнолетност, а во овие пет фестивалски денови „Астерфест“ ќе го полагаше својот испит на зрелоста. Но, по заслуга на „главниот виновник“ Горан Тренчовски, зрелоста на фестивалот е веќе докажана, а ние сме сведоци како истиот, од година во година, таа зрелост ја потврдува се повеќе и повеќе. Така ќе биде и со годинашната програмска понуда со бројни филмови од земјата и странство, зад кои стојат и еминентни филмски автори. Да уживаме во „Астерфест“ и струмичкиот Амфитеатар нека биде вистинското место за споделување љубов, среќа и задоволство“ – кажа градоначалникот Костадинов отворајќи го фестивалот.
На самото отворање Костадинов и ја додели наградата „Астер 2023“ за животно дело на легендарната Каталин Ладик, филмска и театарска актерка и писателка, една од истакнатите, плодните и наградувани претставнички на алтернативната изведувачка уметност во поранешна Југославија и во Унгарија и една од влијателните европски уметнички во последните децении.
„Голема чест и среќа е што доживеав повторно да дојдам во Македонија и еве некако се чуствувам како да летнав до небото“ – кажа годинашниот лауреат Каталин Ладик примајќи ја наградата „Астер“.
ФОТО: Митко Ников
