Почина Примариус д-р Никола Николов – пронаоѓач на нова мутација на хемоглобин позната како „Хемоглобин Струмица“

Вчера на 92-годишна возраст почина најстариот доктор во Струмица, Примариус д-р. Никола Николов, човекот кој својот живот го посвети на медицината и науката.

Неговата кариера беше исполнета со извонредни достигнувања, а најзначајно од нив е откритието на нова мутација на хемоглобин, позната како „Хемоглобин Струмица“.

Примариус д-р. Николов беше вистински столб на струмичкото здравство и остави неизбришлива трага во медицинската заедница. Со својата посветеност и научна љубопитност, тој придонесе за развојот на хематологијата и генетиката, а неговото откритие за „Хемоглобин Струмица“ доби меѓународно признание. Оваа мутација на хемоглобин беше предмет на бројни научни истражувања и помогна во подобро разбирање на крвните заболувања.

Покрај својата научна работа, д-р. Николов беше пример за хуманост, пожртвуваност и професионализам. Стотици пациенти поминале низ неговите раце, а неговата експертиза и топол однос кон болните ќе останат запаметени од многумина.

Струмица загуби исклучителен доктор, научник и човек, чиј придонес ќе се памети уште долго.