Началникот на Секторот за внатрешни работи – Струмица, Кирил Арапов информираше дека во претстојниот празничен период ќе биде зголемена безбедноста и присуството на полициски службеници за одржување на јавниот ред и мир и контролирање на сообраќајот.
„Во пресрет на претстојните Новогодишни и Божиќни празници Секторот за внатрешни работи Струмица презема мерки во насока на одржување на поволна безбедносна состојба на подрачјето на СВР Струмица во областа на јавниот ред и мир, криминалитетот и сообраќајот. Како и претходните години, така и оваа, полициските службеници при редовно извршување на работните задачи плански ќе бидат поставени на места кадешто ќе има поголемо присуство на граѓани, најчесто во централните градски подрачја, пред угостителските објекти коишто организираат прослави и на места кадешто има поголем број присутни од младата популација“ – кажа началникот на СВР Струмица, Кирил Арапов.
Тој најави дека превентивно ќе се постапува со цел да не дојде до нарушување на јавниот ред и мир, а да спречи можно вршење на кривични дела. Началникот Арапов најави и засилени контроли на возачите.
„Полициските службеници ќе ја зајакнат контролата на возачите, со акцент на контролата ќе стават на управување возило под дејство на алкохол и управување на возило со поголема брзина од дозволената, од причина што овие прекршоци во изминатиот период се главни причинители за случените сообраќајни незгоди“ – додаде Арапов.
Апелира до сите граѓани да се потрудат сообраќајната култура во овој период да биде на највисоко ниво.
„Не мислам само на возачите, туку и на пешаците и на другите учесници во сообраќајот, бидејќи кога се движиме низ градовите кадешто нормално во овој период се очекува зголемено раздвижување, бараме од вас да бидете трпеливи и внимателни и да ги почитувате сообраќајните правила и прописи, а пред се и клучно да ги избегнувате неправилните паркирања и здржувања. Апелирам до граѓаните кои планираат новогодишните празници да ги поминат надвор од своите домови да преземат мерки за нивна заштита, на својот имот, а на возачите коишто возат им препорачувам да ја прилагодат брзината според условите и состојбата на патот, доколку конзумираат алкохол да не управуваат возило и никако да не седнуваат зад волан“ – кажа Арапов.
Тој упати и честитка до граѓаните од името на вработените во СВР Струмица по повод Новогодишните и Божиќните празници.
„Дозволете ми од мое лично име и од името на вработените во СВР Струмица на граѓаните да им посакам среќни Новогодишни и Божиќни празници, апелирајќи пред се, во овој прекрасен празничен период да не заборавиме на невидливиот непријател, да ги почитуваме правилата и да славиме одговорно“ – кажа началникот на СВР Струмица, Кирил Арапов.
