Италијанската издавачка куќа „Крочети Едиторе“ ја објави поетската книга „Изреченото нѐ прогонува“ на Никола Маџиров на италијански јазик. Книгата содржи избор од неговото поетско творештво и објавена е во рамки на поетската едиција на италијанскиот издавач со седиште во Милано, заедно со поезијата на Волт Витман. Во истата едиција се објавени и книгите на венцоносците од Струшките вечери на поезијата Јехуда Амихај, Јанис Рицос, Керол Ен Дафи, Махмуд Дарвиш и добитниците на Нобеловата награда – Томас Транстромер, Јон Фосе, Одисеас Елитис, Сен-Џон Перс, како и избори од поезијата на Рилке, Бодлер, Кавафис, Томас Бернхард, Ен Карсон, Дилан Томас, Сеферис, Емили Дикинсон, Борис Пастернак и други.
Промотивното читање на поезијата од книгата „Изреченото нѐ прогонува“ се случи минатата недела во Венеција, во рамки на меѓународниот фестивал за литература „Инкрочи ди Чивилта“ („Раскрсници на цивилизациите“), каде почесен гостин беше Ханиф Курејши.
Позитивни критики за книгата на Никола Маџиров веќе се појавија во италијанскиот дневен весник „Кориере дела сера“ во неделниот додаток за литература „Летура”, во весникот „Буонасера“, а интервјуа со авторот објавија италијанските списанија за култура и литература „Ил Манифесто“ и „Пангеа“.
Книгата ќе биде претставена и на неколку други фестивали и универзитети во Италија и во Швајцарија во текот на оваа година. Никола Маџиров е најмладиот современ странски автор објавен во поетската едиција на „Крочети Едиторе“, а книгата „Изреченото нѐ прогонува“ е двојазично издание и содржи песни на италијански и македонски јазик.
