По пресрет на празникот Рамазан Бајрам во ООУ „Маршал Тито“ во Струмица се одржа хуманитарен настан

Во ООУ „Маршал Тито“ во Струмица денеска се одржа хуманитарен настан по повод празникот Рамазан Бајрам под мотото „Да бидеме светлина за некого“.

Присутните имаа можност да донираат со купување на ракотворби и производи што ги направија учениците со помош на нивните родители, но и во кутијата за донации, а собраните парични средства ќе бидат уплатени на сметката на Црвениот крст на Македонија наменета за семејствата на настраданите во пожарот во Кочани.

На настанот, покрај многуте гости, вработени во училиштето и ученици, соработници, претставници на Одделението за образование во Општина Струмица, присуствуваше и претседателот на Советот, Марјан Даскаловски.

Настанот е поддржан од проектот „Отворете ги прозорците“, преку Детската Фондација Песталоци, а со овој проект кој се реализира во училиштето „Маршал Тито“, трета година по ред, ќе се обезбеди асистивна технологија наменета за учениците со ПОП, со која ќе се подобри квалитетот на наставата преку користење на современи нагледни средства.