Пензионерите и постарите лица во општина Босилово за првпат добиваат Центар за дневен престој

Пензионерите и постарите лица кои живеат во општина Босилово за првпат добиваат Центар за дневен престој на стари лица со активно стареење.

„Отворањето на овој центар се реализира преку Проектот за подобрување на социјалните услуги, а го имплементира Министерството за труд и социјална политика. 24 возрасни лица ќе ги уживаат услугите на овој центар. Преку заеднички активности до среќни пензионерски денови“, објави министерката за труд и социјална политика, Јована Тренчевска.

Центарот се наоѓа во селото Турново, каде преку различен вид активности кои ќе се спроведуваат под надзор на стручни лица, постарите лица ќе добиваат можност за квалитетен, активен живот и социјализација.

Со новиот Центар за дневен престој на стари лица со активно стареење во Турново ќе управува Општинската организација на Црвен крст – Струмица, кој од Министерството за труд и социјална политика ја доби соодветната дозвола за вршење дејност од областа на социјалната заштита.