![almak](https://strumicanet.com/wp-content/uploads/2024/11/srnet-banner-noe-2-optimized.png")
Во рамките на предизборната кампања за Претседателските избори, кандидатот за претседател на Македонија на СДСМ и Коалицијата, Стево Пендаровски синоќа одржа митинг во Струмица.
Пред струмичани, Пендаровски порача дека е важно веќе во среда, на 24 април да се излезе масовно на изборите и да се заокружи бројот 1.
„Да не заборавите, уште во првиот круг ќе се види колку се за демократска, европска и просперитетна Македонија, а кои се за режим. Затоа е многу важно уште на 24 април да им покажеме дека има голем број на граѓани кои ја сакаат европска Македонија“ – порача Пендаровски.
Тој кажа дека само бројот 1 е гаранција за продолжување на патот кон полноправно членство, а се друго е враќање назад во неизвесност, поделби и изолација.
Стево Пендаровски се осврна и на ставот на ВМРО-ДПМНЕ и Христијан Мицкоски во однос на уставните измени.
„Секогаш кога Мицкоски зборува со странски амбасади им вели дека наводно еден од неговите први приоритети ќе биде да ги внесе Бугарите во Уставот. А секогаш кога зборува пред своето партиско раководство или пред македонската јавност зборува обратно. Дека ова не е само празен муабет, или озборување покажува следново: Пред два дена виден е висок претставник на нивната сестринска партија од Германија ЦДУ, даде изјава за македонските медиуми во кое рече, разговарав со раководството на партијата ВМРО-ДПМНЕ вклучително и со Мицкоски и добив цврсто уверување дека уставните промени се нивен приоритет. И сега гледате човек кој, зависно од тоа со кого разговара, одговара на различен начин. Како да му верувате на човек кој едно зборува пред странци, друго зборува пред сопствениот народ“ – кажа Пендаровски.
Обраќањето на кандидатот за претседател Стево Пендаровски, пред голем број граѓани, членови и симпатизери на СДСМ го следеа и кандидатите за пратеници на оваа партија во 4-та ИЕ, Венко Филипче, Јована Тренчевска, Борче Цветков, како и поранешниот лидер на партијата и поранешен премиер, Зоран Заев.
