Општините Струмица и Василево заедно ќе имплементираат проект „Дигитализирано земјоделство, напредно земјоделие“

Од денеска започнува имплементацијата на проектот „Дигитализирано земјоделство, напредно земјоделие“. Со Договорот за меѓуопштинска соработка помеѓу Општина Струмица и Општина Василево, се поставува јасна функционална рамка која ќе биде од корист на младите претприемачи и земјоделци за зголемени приходи, а со тоа и за засилена локална и регионална економија на двете општини.

„Проектот претставува огромен чекор во интенцијата за регионален развој на општините во Република Северна Македонија и за мене, како прв човек на општина Струмица, остварување на целта – директна соработка помеѓу земјоделците и сите оние кои имаа желба и мотив тоа да им биде основна дејност, со локалните и државните власти и институции. Ова е вистинскиот начин за систематски, плански и со точна цел одење во прогрес, за поефективно и економски исплатливо земјоделие. Давам силна поддршка на проектот и ги охрабрувам сите заинтересирани, а посебно младите, да станат активни учесници“, кажа по потпишувањето на договорот градоначалникот на Струмица, Костадин Костадинов.

За градоначалникот на општина Василево, Славе Андонов значајно е што со отворањето на овој Центар бенефит ќе имаат младите претприемачи и земјоделци, но и сите граѓани од двете општини.

„Значајно е што тука ќе се добива помош од страна на обучени лица за нивните бизниси со примена и користење на современите дигитални алатки. Овој Центар е многу значаен, бидејќи нашиот регион е пред се земјоделски и ние како општини посебен акцент ставаме на оваа гранка“, кажа Андонов.

Планирано е отворање на регионална канцеларија и обучен регионален центар за поддршка на бизнис заедницата за поддршка на претприемништвото, туризмот, земјоделството и за регионален развој на струмичкиот микрорегион (Струмица-Василево), со можност за идно проширување.

Во таа насока, двете општини стратешки ќе постават систем кој треба да служи за создавање и користење на нови дигитални алатки и можности, добри практики во процесот на развојот на современо, планирано, организирано и стандардизирано високо квалитетно земјоделско производство и тоа низ серија активности со фокус на едукација, унапредување и промоција на руралниот туризам и домашните земјоделски производи, стратешко планирање на современо, организирано и стандардизирано земјоделско производство, како и организација и учество на манифестации и саеми.