Општина Струмица направи ново мултифункционално спортско игралиште

Струмица го доби и четвртото мултифункционално спортско игралиште со комплетно партерно уредување. Се наоѓа во Втората урбана заедница, кај ООУ „Никола Вапцаров“ и од денеска е пуштено во употреба. Игралиштето е направено со пари од Буџетот на Општина Струмица, 12.000.000 денари и е четврто такво досега направено во градот.

Најрадосни за новото игралиште беа младите жители од овој дел на градот. Радоста со нив ја споделија и градоначалникот Костадин Костадинов, директорот на ЈПКД „Комуналец“ Зоран Горгиев и членови на Советот на општина Струмица.

„Станува збор за проект којшто е производ на добрата соработка со ЈПКД „Комуналец“ и им благодарам на менаџментот и на сите вработени во претпријатието. Продолжуваме со таков тип на игралиште и во Турското маало за кое веќе имаме избрано изведувач и очекуваме деновиве да започнат со работа и секако и во населените места, а за наредната година такво игралиште најавуваме за населеното место Банско. Конкретно, за овој проект станува збор за општинска инвестиција во вредност од близу 12 милиони денари со што ги потврдуваме заложбите на општината преку добрите и мудри одлуки од страна на мнозинството советници во Советот на општина Струмица, како навистина се грижиме за она што значи потреба на граѓаните, секако дека го промовираме здравиот начин на живот, можноста за рекреација на струмичани, на учениците од ООУ „Никола Вапцаров“, но и на граѓаните коишто живеат во Втората урбана заедница“, кажа градоначалникот Костадин Костадинов.

Со новото игралиште уредена е вкупна површина од 2.200 метри квадратни.