Општина Василево го одбележа Денот на општината – пред 26 години одржана првата конститутивна седница на Советот

Со свечена седница на Советот на општина Василево денеска беше одбележана 26-годишнината од одржувањето на првата конститутивна седница на Советот, од тогаш денешниот ден, 16-ти Декември се одбележува и како Ден на општина Василево.

„Како актуелен градоначалник, заедно со Советот во кој функционираме како едно, без разлика на политичката определба, со кој имам одлична соработка, во периодот во кој сум прв човек на општината, успешно го продолжувам нејзиниот развој. Развојот кој започна пред 26 години и во кој учествуваа моите претходни колеги и советници. Со секој нов ден, максимално, со ангажирање на сите потенцијали и ресурси, работам на подобрување на се она што значи услови за живеење во општина Василево“ – кажа во своето обраќање градоначалникот Славе Андонов.

Градоначалникот Андонов говореше за сите досега реализирани мали и големи зафати, проекти, успешно затворени прашања, кои, како што кажа од ден во ден ја менуваат сликата на населените места.

„Сето ова е резултат на многу работа, вклученост на сите потенцијали, умешност за менаџирање на различни состојби и секако добрата соработка што Општина Василево ја има со сите институции“ – нагласи Андонов, осврнувајќи се на постигнатите резултати и најавувајќи развој на општина Василево и во наредниот период.

„Креиравме буџет на демократски и партиципативен начин, граѓаните мора да знаат за кои проекти и идеи ќе се трошат нивните пари. Со добро планирање, многу залагање, континуирана работа  и вклученост на сите жители од заедницата во нејзиниот развој, напредокот на општина Василево е сигурен. Затоа почитувани присутни, денеска кога ја одбележуваме 26-годишнината, порачувам дека заедно, единствени околу приоритетите и во согласност со можностите, имаме сигурна реализација на  планираното“ – кажа Андонов.

На седницата присуствуваа директори на јавните општински претпријатија и установи, дел од поранешните градоначалници на општина Василево, градоначалници од соседните општини, соработници и пријатели на општина Василево.