Општина Босилово се подготвува за Новогодишните и Божиќните празници. Направи богата програма за сите возрасти со настани кои ќе се одржуваат од 25 декември 2024 до 12 јануари 2025 година.
„Новогодишната магија – Босилово 2025“ ќе започне со новогодишна забава за деца на 25 декември (среда) во 12:00 часот на центарот во Босилово, каде ќе се одржи интерактивна забава со јунаците од цртаните филмови (аниматори за деца), фотографирање со Дедо Мраз и делење на новогодишни пакетчиња.
Следниот настан ќе биде во четврток, 26 декември од 19:00 часот во Домот на културата во Босилово, каде КУД ФА „Гоце Делчев“ од Босилово ќе одржи Новогодишен концерт.
На 27 декември (петок) напладне, во 12:00 часот, во Домот на културата во Босилово ќе се одржи Новогодишна приредба на учениците од ООУ „Гоце Делчев“ од Босилово.
Во недела (29 декември) е Новогодишниот базар. Ќе се одржува на центарот во Босилово од 13:00 часот, а ќе биде збогатен со изложба на новогодишни ракотворби, дегустирање на греано вино, греана ракија, топол чај, домашни колбаси, а сето тоа збогатено и со музика.
Новогодишен настан ќе има и во селото Секирник, на 30 декември (понеделник) во 10:00 часот. Во Домот на културата во Секирник учениците од ООУ „Св. Кирил и Методиј“ од Иловица ќе изведат новогодишна претстава за деца.
На 4 и 5 јануари (сабота и недела) во Мултифункционалниот центар во Босилово ќе се одржи Новогодишно-Божиќен турнир во шах.
На првиот ден од Божиќ, 7 јануари (вторник), Општина Босилово ќе организира Хуманитарна акција – „Божиќни празници за сите“, на која ќе дели пакети со храна и пијалоци за социјално загрозени семејства.
На 9 јануари (четврток), во 13:00 часот по четврти пат во Етно ресторанот „Кај Виктор“ ќе се одржи традиционалната Божиќна средба „Сите сме исти и сите заслужуваме радост“.
Последниот настан од „Новогодишната магија – Босилово 2025“ ќе се одржи на 12 јануари (недела) од 18:00 часот во Домот на културата во Босилово, каде ќе биде прикажан новогодишниот филм „Јорговани“.
Од Општина Босилово јавната покана до сите граѓани: „Ве очекуваме, заедно да прославуваме, да се дружиме и да уживаме во новогодишната атмосфера“…
