Од утре до 9 јуни во Струмица „Classic International Festival Strumica 2023“

Од утре до 9 јуни во Струмица ќе се одржува вториот „Classic International Festival Strumica 2023“. Идејниот творец и селектор на фестивалската програма, проф. м-р Васил Атанасов денеска во присуство на своите соработници одржа прес конференција најавувајќи ја програмата на годинашниот фестивал на класичната музика во Струмица.

На три локации ќе се одржат пет концерт на врвни музичари од Македонија, Бугарија, Србија и Словенија, а освен солистичка и хорска музика ќе има и камерна музика.

Официјалното отворање на фестивалот е утре во 20:00 часот во Центарот за култура „Антон Панов“, а веднаш потоа е првиот концерт на Дуо „Селена“ – Келтски харфи, односно Кохар Андонијан и Лилијана Стоева од Бугарија.

Вториот концерт е во сабота, 3 јуни од 20:00 часот во Црквата „Св. Петнаесет Тивериополски свештеномаченици“ каде свој концерт ќе одржи македонскиот мешан хор „Мелизма“, под диригентство на Марија Андонова.

Следниот концерт е на 5 јуни (понеделник) од 20:00 часот во Центарот за култура „Антон Панов“. Од Србија доаѓаат „ДУО“ виолина-клавир со Јована Богосављевиќ и Бојан Младеновиќ.

Фестивалот „Classic International Festival Strumica 2023“ продолжува на 7 јуни (среда) од 20:00 часот во Градската Уметничка галерија на струмичкиот плоштад со концерт „Трио сопран, кларинет, пијано“ во изведба на нашите врвни музичари Марија Наумовска Бакревски – сопран, Игор Бакревски – кларинет и Иван Еминовиќ – диригент.

На последниот ден од второто издание на фестивалот во Центарот за култура, петок 9 јуни во 20:00 часот, со свој концерт ќе настапи „Клавирско дувачко трио“ од Љубљана, Словенија во состав Јоже Котар – кларинет, Зоран Митев – фагот и Лука Ферини – пијано.

„Струмица е град со традиција и историско културно наследство од сите сфери, град кој ја сака музичката уметност, театарот, филмот, сликарството и културата воопшто и има убава традиција на културни настани. Со овој фестивал сметаме дека ќе го збогатуваме културното живеење на Струмица и регионот, бидејќи градот го заслужува тоа не само заради традицијата која ја има, туку и заради местоположбата на градот со соседите со што ќе стане уметнички центар на Балканот“, кажа професорот Атанасов упатувајќи јавна благодарност до градоначалникот Костадин Костадинов и Советот на општината Струмица кои се покровители на овој фестивал.