Од септември се зголемуваат пензиите за 2.500 денари, а од март за уште 2.500 денари

Владата на денешната седница донесе одлука за зголемување на пензиите од 5.000 денари, а ќе се реализира на два пати, од кои првата исплата од 2.500 денари ќе биде во септември, а втората од 2.500 денари ќе следува во март.

Новата министерка за финансии, Гордана Димитриовска Кочовска за ТВ Канал 5 вели дека со тоа ќе биде исполнето ветувањето што им го дадоа на пензионерите за линеарно покачување од 5.000 денари во првата година од мандатот, иако дел од пензионерите бараа покачувањето да се случи одеднаш.

„Пензионерите не добиваат еднократно, туку ова е трајно решение. Тој што имал 15.000 денари од месец март следната година ќе има 20.000 денари и тоа е доживотно, односно веќе на таа пензија од 20.000 денари ќе си се усогласува два пати годишно согласно законот“, појасни министерката Горадана Димитриовска Кочовска.

Во Македонија во март имало точно 338.336 пензионери, а половина од нив месецот го преживуваат со 13.000 до 22.500 илјади денари. Според Владата, со линеарното зголемување нема да се направи дополнителен јаз кој, како што велат, се правеше со претходниот начин каде зголемувањето беше процентуално.