Новата струмичка болница наскоро ќе биде пуштена во употреба – кабелот до трафостаницата е поврзан

„Струмичката болница која е изградена уште во 2021 година, но четири години не е пуштена во употреба поради фамозниот кабелски приклучок, наскоро ќе биде пуштена во функција“, најави премиерот Христијан Мицкоски.

„Колку и да е парадоксално, кабелот беше причина што досега не проработи новиот дел на струмичката болница. Една од најсовремените болници во јавното здравство во Македонија не е во употреба иако изградбата беше завршена уште во 2021 година“ – рече Мицкоски.

Мицкоски во Собранието рече дека кабелот е конечно поврзан и дека наскоро новиот дел од болницата ќе биде пуштен во употреба. Во болницата со години не се приклучуваше струја, иако беше инсталирана опремата. Во новиот дел кој се простира на површина од 6.500 м², се сместени Ургентен центар и уште осум одделенија, а секое одделение ќе има своја сала за операција.

„Завршена е конечно Струмичката болница и таа ќе биде наскоро пуштена, а фалеше, замислете, енергетскиот кабел да се поврзе со трафостаница. Тоа требаше само да се направи. Зборуваме за неколку стотини метри“, рече Мицкоски.

Досега објаснувањето беше дека изведувачот набавил алуминиумски, наместо бакарен кабел, поради што и дошло до недоразбирање со проектот за поврзување.