Народниот правобранител отвори бесплатна телефонска линија за пријавување евентуални повреди на избирачкото право за време на гласањето во првиот круг од Локалните избори што ќе се одржат во недела.
Доколку граѓаните забележат неправилности или попречување при остварувањето на своето право на глас, ќе можат да се јават на бесплатниот број 0800-54321, кој ќе биде активен од 07:00 до 19:00 часот.
Освен телефонски, пријави ќе можат да се поднесат и лично во седумте канцеларии на Народниот правобранител во Скопје, Битола, Кичево, Куманово, Струмица, Тетово и Штип.
Граѓаните од Струмица и околината ќе можат директно да се обратат во струмичката канцеларија на Народниот правобранител, на телефонскиот број 034 329 996, доколку сметаат дека им е повредено избирачкото право.
Од институцијата потсетуваат дека надлежните органи се должни да обезбедат целосна заштита на уставно загарантираното право на глас, кое се остварува непосредно и тајно на избори.
„Избирачкото право е уставно загарантирано како еднакво, општо и непосредно, и се остварува на слободни избори со тајно гласање. Никој не смее да биде повикан на одговорност поради остварување на ова право, поради што повредата на слободата на определување на избирачите, како и други повреди на избирачкото право, се казниви дела“, соопштија од Народниот правобранител.
