Накратко со Александар Илиев од ЗНАМ за претстојните Локални избори и нивното учество

Александар Илиев од Струмица, член на Извршниот одбор на ЗНАМ – За наша Македонија говори за идниот настап на ЗНАМ на претстојните Локални избори, за очекуваните резултати, за визијата на ЗНАМ за општина Струмица, но и за идеите на струмичани.

СтрумицаНет: Кои се плановите на ЗНАМ за Наша Македонија за иден настап на локалните избори?

Илиев: Раководството на ЗНАМ на национално ниво одлучи партијата да има настап со самостојни листи за советници. Во тек е финално договарање за поддршка на кандидатите за градоначалници меѓу коалициските партнери. Според анкетите кои ги правеше партијата се очекува сигурна победа во Куманово, а постојат реални шанси за значајна победа во Центар и во уште неколку општини. Во однос на Струмица, ЗНАМ ќе има своја советничка листа, која ќе биде спој на  млади, енергични и искусни луѓе кои веќе оставиле трага во животот на струмичани. ЗНАМ со квалитетот на листата во Струмица ќе покаже дека е партија која претендира да биде клучен фактор во идната општинска власт и партија која ќе ја наметне својата програма.

СтрумицаНет: Кој е вашиот очекуван резултат и на што ги засновувате вашите предвидувања?

Илиев: На национално ниво ЗНАМ ќе стане партија со неколку градоначалници и ќе има клучна улога во советите на повеќе општини. Во Струмица, очекуваме да сме конкурентни на ВМРО-ДПМНЕ и СДСМ. Анкетите направени во мај 2025 година, за општина Струмица покажува дека и ВМРО-ДПМНЕ и СДСМ имаат поддршка под 35%. Според тие анкети ние бевме клучот за мнозинство во советот. Едновремено ЗНАМ во Струмица постојано расте и со сигурност ќе биде партијата од која ќе зависи не само кој, туку и како ќе се менаџира Струмица. Граѓаните долго време бараат опција составена од способни и чесни луѓе, а сигурен сум дека во нас ќе ја препознаат таа надеж. Веќе имаме пријавено над 60 квалитетни активисти за следните Локални избори во општина Струмица и создаваме програма која е оригинална. Дополнително, секој ден во партијата ни се приклучуваат нови членови. Трендот на раст не прави да бидеме реални оптимисти за многу голем успех на Локалните избори во општина Струмица и општина Василево. Друг фактор кој влијае на изборите во Струмица е тоа што ние веќе имаме функционер од Струмица кој покажа дека сме различни од другите партии. Струмичани може секој ден да видат дека пратеникот Миле Цеков е меѓу народот и е достапен за сите, а за прв пат имаме пратеник од Струмица кој не зема надоместок за патни трошоци. Цеков покажа и дека нашите ставови пред и после избори не се менуваат. Во Собранието тој за залага за истите работи кои ги ветуваше пред изборите. Таа наша постојаност во ставовите со сигурност ќе биде дополнителен фактор за успех.

СтрумицаНет: Каква е визијата на ЗНАМ за Струмица?

Илиев: Ние имаме визија за промени кои ќе ја направат Струмица уникатна и подобро место за живеење, како и место во кое се заштитени чесните граѓани. Во овој момент не може да споделам детали за програмата и тоа ќе го оставам за периодот пред изборите. Меѓутоа може да дадам одредени примери во која насока ќе оди нашата програма. Ние се залагаме за даночни и други олеснувања за земјоделците. Ние сакаме нашите села да станат слични на селата во Англија, Германија и Словенија. Ние се бориме за здрава животна средина преку прогласување на Беласица за заштитена зона и сме за забрана за отворање на рудници на Огражден. Сметаме дека струмичани не треба да бидат жртви на несовесни лица и компании кои го загадуваат воздухот. Ние сакаме во Струмица да се стави ред со веќе огромниот број дивоградби и ќе спречиме бесправно сечење на дрва на ридовите над градот. Или ете да се запрашаме, зарем чесните граѓани треба да бидат жртва на лица кои го кршат законот, а општината треба да ги брани оние кои прекршуваат закон? Зарем уште треба домовите на нашите сограѓани на улица „Младинска“ да се поплавуваат или улиците во населбата Карпош да бидат без улично осветлување и преполни со ѓубре? Зарем треба Балдовци, Куклиш и Добрејци да не се поврзани со градот со пешачка и велосипедска патека и да не се подобро урбанизирани? Иако се очигледни правичните одговори на моите прашања, граѓаните треба да знаат дека проблемите не може да ги реши оној кој ги создал. Затоа ние ќе понудиме листа составена од способни и чесни лица кои ќе можат и кои сакаат да ги направат промените.

СтрумицаНет: Во изминатите недели низ Струмица можеше да се видат членови на ЗНАМ како анкетираат граѓани. Како напредува оваа ваша активност?

Илиев: Анкетирањето има за цел да направиме не наша програма, туку програма на струмичани. Анкетирање има за цел да излеземе од кругот на наши членови и активисти и да ги слушнеме неопределените, а често разговараме и со граѓани кои се симпатизери на други партии. Нашите пултови ги поставуваме на различни локации, за да допреме до различни луѓе. Веруваме дека само така може да дојдеме до реална претстава за ставовите и потребите на нашите сограѓани. Може да кажам дека од она што досега го собравме имаме многу конкретни предлози што сакаат граѓаните да направи идната општинска власт и предлози какви луѓе сакаат да бидат дел од советот. Сепак секоја идеја може да ја направи нашата програма не само наша, туку програма на граѓаните на Струмица. Ги поканувам сите наши сограѓани да пријдат на нашите пултови и да ги пополнат анкетните листови или преку разговор со наши активисти да си ги кажат ставовите. Граѓаните треба да знаат дека она што ќе го кажат ќе биде разгледано од наш тим и реално може да стане дел од нашата програма. Верувам дека повеќемина пријатно ќе се изненадат кога ќе го прочитат она што го предложиле како дел од нашата идна програма. Тоа ќе е дополнителен пример дека Струмица веќе има партија која е реално партија од народот за народот.