„Јазикот е нашата татковина“ од Блаже Конески, „Кажете ѝ на мајка ми нека не жали оти сепак ние ќе победиме“ од Кочо Рацин, ова се дел од цитатите на најголемите македонски автори кои Министерството за култура вечерва до полноќ ги проектира на зградата на СОУ „Јане Сандански“ во Струмица како дел од програмата за одбележување на 5 Мај – Денот на македонскиот јазик.
„Денес се радуваме на сѐ што правиме за македонскиот јазик. Тоа ни дава сила за уште од утре да продолжиме уште повеќе да го чуваме, учиме и промовираме. Во таа чест и во чест на Денот на македонскиот јазик, 5 Мај, неколку маркантни јавни локации низ државата вечерва ги осветливме и обоивме со најсилните стихови од македонска поезија и музика и со цитати на дејци кои силно се врежани во меморијата на македонската култура и идентитет“, соопшти министерката за култура, Бисера Костадиновска Стојчевска.
