![almak](https://strumicanet.com/wp-content/uploads/2025/07/1080x206-srnet-optimized.png")
12-годишниот Стефан Ончев од Струмица со награда за најдобро отсвирено дело од јапонски композитор на меѓународниот натпревар по пијано „Piano key“ во Скопје. Наградата му беше доделена од страна на јапонскиот амбасадор во Македонија, Н.Е. Казуа Отсука. Стефан, исто така е добитник и на прва награда со освоени највисоки поени во неговата категорија.
Повеќе од 80 учесници од Македонија, Хрватска, Србија, Босна и Херцеговина и САД, кои се натпреваруваа во неколку категории на меѓународниот натпревар „Пијано клавиш“, кој се одржа викендот во скопски КИЦ.
Во третата категоријата Стефан го освои првото место, со најголем број на бодови во својата категорија.
Стефан е ученик во основното музичко училиште “Боро Џони” во Струмица, а пијано изучува кај наставничките Ана Цунева од Струмица и Марија Максимова од Штип.
Натпреварот беше поддржан од амбасадите на Јапонија и Австрија во Скопје и беа доделени и специјални дипломи за најдобра изведба на дело од јапонски и за најдобра изведба на дело од австриски композитор.
Ова е прв меѓународен натпревар по пијано во Скопје во организација на Здружението за промоција и развој на културата „Модорас“, а уметнички директори се Ема Попивода, професор по пијано на Музичката академија во Штип и Светлана Димитриевска, наставничка по пијано во ДМБУЦ „Илија Николовски-Луј“ во Скопје.
