Министерот за локална самоуправа, Златко Перински, заедно со градоначалниците на општините Радовиш, Василево и Босилово, Ацо Ристов, Славе Андонов и Ристо Манчев, извршија увид на тековните инвестиции што се реализираат преку Програмите за рамномерен регионален развој.
Во фокусот на посетата беа три значајни проекти кои опфаќаат повеќе активности и се спроведуваат во различни општини од Југоисточниот регион:
- „Подобрување на енергетската ефикасност на јавни објекти во Југоисточниот регион“ – проект со вкупна вредност од 33.825.422 денари. Корисници на проектот се општините Радовиш, Гевгелија и Босилово.
- „Создавање на модерна патна мрежа во Југоисточниот плански регион“ – проект со вкупна вредност од 8.866.118 денари. Корисници на проектот се општините Босилово и Василево.
- „Дигитализација во основното образование со помош на смарт табли“ – проект со вкупна вредност од 2.268.000 денари, со кој се обезбедени 23 интерактивни табли за основните училишта во општините Василево, Богданци, Босилово и Ново Село.
„Во Радовиш пожарникарите добија поекономичен објект во кој можат мирно да ја вршат својата работа. Во Босилово и Василево движењето е полесно за сите – од ученици до земјоделци, се со цел да можеме брзо и безбедно да стигнеме до услугите што ни се важни. А во училиштата во неколку општини поставивме современи табли, за наставата да биде поинтересна, поблиска до децата и поупотреблива во пракса“, истакна министерот Перински.
Со реализацијата на овие инвестиции се придонесува кон подобрување на условите за живот на граѓаните и се создаваат можности за одржлив локален развој на целиот Југоисточен регион.
