Министерот за култура и туризам, Зоран Љутков, денеска беше во работна посета во Струмица, Банско и Водоча, при што најави важни капитални проекти кои Министерството ќе ги реализира во следниот период. По средбите со раководствата и вработените во културните институции и Епископот Стобиски Јаков од Струмичката Епархија, министерот Љутков истакна дека во изминатите месеци е вложен значителен труд во развојот на стратегија за заштита на културното наследство, со цел да се утврдат приоритети за работа низ цела Македонија.
„Денеска со големо задоволство ги најавувам четирите капитални проекти кои ќе започнат годинава во Струмица. Овие проекти не само што ќе ја подобрат инфраструктурата, туку и ќе придонесат за зајакнување на нашето културно наследство и подобрување на животот на граѓаните“ – кажа Љутков.
Станува збор за Конзервација, реставрација и санација на црквата „Свети Кирил и Методиј“. Проект кој ќе биде реализиран во соработка со Завод и Музеј Струмица, и е од исклучителна важност за локалната заедница. За него ќе бидат обезбедени 15 милиони денари, а распишувањето на јавната набавка ќе започне овој месец.
Довршување на Стариот струмички театар – проект кој беше запоставен од претходната влада, сега повторно е во фокусот на Министерството. За целосната реализација на овој објект, се одвоени над 196.000.000 денари.
Проект за кровна конструкција на термалното лекувалиште Бања Банско. Со поддршка од Европската унија, проектот е веќе одобрен, а за него се предвидени над 25.000.000 денари. Во склоп на проектот ќе биде поставен инфо пункт за туристи.
И Конзервација и санација на кровот на манастирот „Св. Леонтиј“ во Водоча. За реализација на проектот, кој е од суштинско значење за историјата на Струмица, ќе бидат одвоени 1.200.000 денари.
Министерот Љутков имаше и работна средба со Драган Маџиров, директорот на Центарот за култура „Антон Панов“ и вработените во оваа национална установа, со актерите во Струмичкиот театар, при што разменија информации за тековните активности и идните програми.
„Очекувам богата културна програма и зголемување на активностите во Струмица, што ќе доведе до значителен напредок во културниот живот на оваа општина“, додаде Љутков.
Со овие проекти, Министерството за култура и туризам верува дека ќе се направат значајни чекори кон развојот на културното наследство и подобрувањето на животот на граѓаните во Струмица.
