Маџунков: Во 2024 година ќе се набават електрични комбиња за јавен превоз по цена од 350.000 евра

Координаторот на советничката група на ВМРО-ДПМНЕ во Советот на општина Струмица, Никола Маџунков вели дека во предложениот Буџет за 2024 година се кратат голем број на средства од капитални објекти и програми коишто значат развој за градот, од инвестиции во градежништво, од асфалтирање на улици, од купување на опрема и маеханизација во сите јавни претпријатија, се крати и од основните и средните училишта, а како што кажа Маџунков, со единствена цел во 2024 година се набават електрични комбиња за потребите на јавниот превоз на општина Струмица, коишто се по цена од 350.000 евра со капацитет за 20 патници. Тој направи споредба со јавна набавка на Општина Штип за купување на шест автобуси со капацитет за 100 и за 60 патници, а по цена од околу 150.000 евра.

„Од бројките во Буџетот за 2024 година јасно се гледа дека Општина Струмица нема капацитет за толку скапи електрични комбиња и со тоа се доведува во прашање јавниот превоз во општина Струмица, којшто е меѓу последните големи општини кои нема јавен превоз. Од друга страна, како пример за тоа дека јавниот превоз е во опасност, се и двете „паднати“ јавни набавки за електрични комбиња кои во 2023 година не успееја“ – кажа координаторот Никола Маџунков на денешната прес конференција која оваа советничка група ја одржа пред почетокот на денешната 32-ра седница на Советот на општина Струмица.

Маџунков кажа дека имале забелешки и за тоа што во новиот Буџет за 2024 година немало зголемување на средствата за заштита на животната средина во услови кога има најголемо загадување на воздухот во Струмица.

Тие за денешната расправа поднеле повеќе амандмани за 50-тина проекти, меѓу кои ги спомна, за субвенционирање на инвертори за домаќинствата, за субвенција на фотоволтаични 20-киловатни фотонапонски централи за угостителските објекти и за стопанските објекти со што, како што кажа Маџунков, ќе биде директна мерка во борбата против загадувањето и заштита на животната средина.