Ленче Кукиќ победи на годинашното 31. издание на реномираниот фестивал „Охрид Фест – Охридски Трубадури 2024“. Вечерва во Фолк вечерта на сцената Долни Сарај, од 18 изведни новосоздадени песни, стручното жири на Ленче и ја додели првата награда за песната „Добри ангели“ за која како комплетен автор се потпишува Дејан Георгиевски-Ѕене. Ленче за оваа песна ја добри и наградата на акредитираните новинари на фестивалот.
Уште двајца струмичани се закитија со награда вечерва. Горан Кукиќ за најдобра интерпретација на песната „Уште си најубава“ од Григор Копров, како автор на музиката, Борче Нечевски се потпишува како автор на текстот, а аранжанот го направи Иван Кукиќ, награда која ја додели стручното жири на фестивалот.
По подолга пауза поранешниот вокален солист на групата „Легато“ од Струмица, Катерина Ристова, која живее во САД, дебитираше на овој фестивал и од жирито ја доби наградата за најдобар дебитант за изведба на песната „Дај Боже, дај“ од авторите Дарко Илиевски и Ѓорги Калајџиев.
Утревечер во интернационалната вечер на поп музика ќе видиме и слушнеме уште еден струмичанец кој исто така ќе дебитира на фестивалската сцена. Јосе Шапков кој ќе настапи со песната „Бели цветови“. ТВ Канал 5 ќе врши директен пренос и од оваа вечер во 21:00 часот.
