По стравотниот пожар во дискотеката „Пулс“ во Кочани во кој загинаа 59 лица, граѓанската иницијатива „Кој е следен?“ денеска повика на јавни собири на плоштадите во македонските градови.
„Македонија повторно е завиена во црно. Уништени и во грч седиме пред екраните во исчекување на нова поголема бројка, во исчекување на нова поголема тага. 59 млади лица не го видеа денешниот ден. Дупло повеќе се во болници и тешко повредени. Ние, како и децата во дискотеката, сме повторно беспомошни и оставени сами на себе.
Во овие траорни денови, Македонија треба да биде заедно. Треба да си бидеме рамо за плачење и треба да си дадеме еден на друг утеха, ако воопшто и можеме. ,,Кој е следен?” повикува на заедништво во ужасов. Ги повикуваме сите луѓе низ цела Македонија, утре во 18:00 часот да се соберат на плоштадите од своите градови и да не поминуваат низ ова сами.
Повикуваме во чест на починатите да се поделат црни ленти, за како народ да покажеме дека згаснатите животи нема да бидат заборавени. Тек допрва ќе доаѓаат црните денови за нас, а низ Македонија заедно ќе се тагува и плаче. Така, ќе треба и Македонија заедно да се лечи“, стои во соопштението на граѓанската иницијатива „Кој е следен?“.
На најавните фотографии на „Кој е следен?“ се повикува јавните собири да се одржат не само во Скопје, туку и во другите градови: „Не само во Скопје, ги повикуваме сите луѓе низ Македонија да излезат на плоштадите во своите градови и да ја споделат тагата“.
Струмица | 18 март 2025, вторник | 18.00 часот | Плоштад „Гоце Делчев“
