„Комуналец“ објави 16 микробиолошки анализи од акредитирани лаборатории – АХВ не им ја тргнува забраната на водата за пиење

ЈПКД „Комуналец“ Струмица објави 16 микробиолошки анализи изработени од страна на акредитирани лаборатории и во сите нив стои дека „Испитаниот примерок на вода е здравствено исправен согласно Правилникот за безбедноста на водата“.

„Само резултатот од анализата направена од страна на Институтот за јавно здравје – Скопје ја немаме добиено, за кој од страна на медиумите дознавме дека не одговара на Правилникот за безбедност на водата, поради присуство на колиформни бактерии“ – соопштија од „Комуналец“.

Од комуналното претпријатие велат дека во исчекување на резултатите од Институтот за јавно здравје – Скопје, продолжуваат со активностите за водоснабдување на граѓаните со питка вода се до моментот кога инспектор од Агенцијата за храна и ветеринарство им даде решение дека водата официјално е за пиење.