Агенцијата за млади и спорт на крајот од веќе старата 2022 година го објави тендерот за изградба на затворен пливачки базен во Струмица, а освен во Струмица вакви базени истовремено ќе се градат и во Кавадарци и скопската населба Карпош.
Според тендерската документација станува збор за базен со должина од 25 метри и ширина од 9 метри со променлива длабочина од 80 сантиметри до 1 метар и 20 сантиметри.
Во февруари ќе се знае која фирма ќе го добие тендерот за изградба на затворениот пливачки базен на местото каде беше некогашниот АТШ „Берово“ во Струмица, односно спроти Спортскиот центар на Горан Пандев.
Градоначалникот на Струмица, Костадин Костадинов на последниот ден од старата 2022 година на Фејсбук се пофали дека објавен е тендерот за изградба на затворен базен во Струмица.
„За крај како градоначалник од збор, сакам да ја заокружиме годината со уште еден проект. Вчера е објавена јавната набавка за изградба на затворен базен во Струмица. Мои струмичани од градот и од населените места, нека Ви е со среќа уште еден значаен капитален проект. 2022 навистина ја направивме да биде година на спортот“ – напиша Костадинов.
