Католичката Катедрала во Струмица „Успение на Пресвета Богородица“ го одбележа својот патронен празник

Со свечена архиерејска Литургија на која служеше Н.П. монс. д-р. Киро Стојанов, Скопскиот бискуп и Струмичко-скопски епарх и свештеници од епархијата и Скопската бискупија, а во присуство на голем број верници, беше одбележан патрониот празник на Католичката Катедрала во Струмица, „Успение на Пресвета Богородица“.

Во своето обраќање пред верниците, владиката Стојанов ја истакна важноста на празникот Успение на Пресвета Богородица, кој, како што рече, претставува потсетник за величието, скромноста и понизноста на Марија.

„Таа, како мала и безначајна слугинка на Господ, со својата верност заслужи небесна слава каква што ниедно друго човечко суштество не добило“, кажа д-р. Киро Стојанов.

Владиката се осврна и на јубилејот 100 години од основањето на парохијата „Успение на Пресвета Богородица“, потсетувајќи дека првата парохија во Струмица била основана во 1925 година од благопокојниот епископ д-р Дионизије Њаради.

По прогонствата за време на Втората балканска војна во 1913 година, заедницата од Кукушката унија го пронашла својот дом на овие простори, останувајќи цврсто приврзана за Христовата наука и единството со Светиот Отец. Владиката Стојанов истакна дека основањето на парохиската заедница е повеќе од градење на храм, тоа е создавање жива заедница.

„Црквата како зграда е само знак дека постои народ кој се собира за средба со Бог. Живата заедница е вистинската Црква“, кажа владиката, потсетувајќи на зборовите на покојниот папа Фрањо дека „затворена црква е музеј“.

Освен свеќи и молитви за здравје, традиционално во чест на празникот, по завршувањето на свечената Литургија, домаќините во дворот на Катедралата подготвија заеднички ручек за верниците, кој се служеше за добро здравје.