Излезе од печат нова книга од струмичанецот Ацо Гогов – „Патот накај дома“

„Патот накај дома“ е најновото издание на Ацо Гогов, македонски писател, драматург и книжевен и театарски критичар од Струмица.

Станува збор за есеи и записи – книжевни, театарски и филмски теми и е сочинета од текстови, кои, главно, се однесуваат на творци или институции од Струмица и струмичко: Антон Панов, Видое Подгорец, Митко Маџунков, Митко Петро, Васе Манчев, Бранко Ставрев, Мите Грозданов, Киро Урдин, Кочо Урдин, Киро Донев, Иван Котев, Виолета Танчева-Златева, Лилјана Пандева… Но и творци од други средини, кои, во одреден момент, патот ги донел накај Струмица: Коле Чашуле, Луан Старова, Славица Гаџова, Боро Степановиќ и други.

„Книгава ја чувствувам како еден вид оддолжување на мојот град, на Струмица. Можеби и затоа ми е најдрага“ – вели авторот Гогов најавувајќи дека наскоро ќе биде и промоцијата на оваа негово дело.

Ацо Гогов е роден 1971 година во Струмица. Дипломирал на Катедрата по општа и компаративна книжевност на Филолошкиот факултет „Блаже Конески“ во Скопје со тема од новата македонска драма. Во струмичкиот театар вработен од 2014 година. Автор на три книги проза: „Географија на маленкоста“ (куси прози) во 2009 година, „Единствен матичен број“ (куси прози и раскази) во 2012 година и „Триптихон“ (куси прози) во 2016 година. Застапен е во неколку антологии. Во првата македонска антологија на песна во проза „Бденија и виденија“ во 2013 година во издание на „Антолог“ од Скопје. Во малата антологија на македонска микрофикција „Летаат приказни“ во издание на „Темплум“ од Скопје во 2019 година. Во антологијата на македонскиот краток расказ „Џинџуџе во земјата на афионите“ („Темплум“, 2022). Во 2019 година излезе од печат неговата книга театарски есеи и записи со наслов „Децата на Мнемосина“. Автор на неколку драматизации и адаптации за претстави за деца и возрасни. Ја приредил за печат необјавената драма „Вероника Самарак” од Антон Панов во 2018 година. Негови кратки раскази се објавени во тематот за современа македонска микрофикција во новосадското списание „Полја“ во 2019 година.