И во Струмица премиера на филмот „Чувари на формулата“ од Драган Бјелогрлиќ на 9 ноември во Центарот за култура

Филмот „Чувари на формулата“ на српскиот режисер и актер Драган Бјелогрлиќ кој освои две награди на фестивалот во Локарно, на 9-ти ноември (четврток) во 20:00 часот, премиерно ќе биде прикажан во Центарот за култура „Антон Панов“ во Струмица.

Филмот, кој во Србија се нарекува „Српски Опенхајмер“, за инцидент со радијација во 1950-те во југословенскиот Нуклеарен институт Винча, поддржан од Еуримаж е копродукција меѓу Србија, Словенија, Црна Гора и Македонија, која преку Агенцијата за филм го поддржа на конкурсот во 2016 година.

Во екот на кризата од Студената војна, група научници од Институтот Винча спроведуваат таен проект предводен од професорот Драгослав Поповиќ. Поради непредвидени околности, тие се изложени на смртоносна доза на радијација, поради што југословенската тајна полиција ги носи на лекување во Клиниката Кири во Париз. Францускиот медицински тим предводен од професорот Жорж Мате заклучува дека нивната состојба е критична и дека деновите им се избројани. Предлага, за прв пат тогаш, да се изврши деликатна и неизвесна интервенција. Дали е тоа експеримент врз живи луѓе или искрена желба да им се помогне – станува мачно прашање за југословенските научници.

Жанр: Драма, Трилер, Историски

Глумци: Alexis Manenti, Radivoje Bukvić, Lionel Abelanski, Jérémie Laheurte, Olivier Barthélémy, Anne Serra, Predrag Miki Manojlovic, Dragan Bjelogrlić, Jurij Drevenšek.

Четврток, 9 ноември | 20:00 часот | Центар за култура – Струмица | Влезница: 200 денари