![almak](https://strumicanet.com/wp-content/uploads/2025/07/1080x206-srnet-optimized.png")
Поминаа 13 години откако не напушти легендата на македонската песна, струмичанецот Гоце Арнаудов. Во негова чест, во неговата Струмица се организираше концерт на кој најпознатите македонски естрадни имиња ги пееја песните на Гоце.
Кристина Арнаудова, Ламбе Алабаковски, Јордан Митев, Ленче и Горан Кукиќ, Елена Велевска, Александра Јанева, Мартијан Кириловски, Миле Кузмановски, Огнен Здравковски, Борис Димов, Јоце Панов, Јовче Пандев, Александар Тарабунов и Ансамблот „Распеани Струмичани“ се имињата кои ги пееја хитовите на Гоце.
Во полната сала, покрај неговите сограѓани, пријатели, музичари, беа и неговото семејство, ќерката Харита и синот Оскар, но и двајцата композитори Миле Барбаровски и Ванчо Тарабунов, кои „рокерот“ Гоце кој со својата група „Крик“ свиреше во Белград, буквално го вратија во Македонија и ја почнуваат неговата музичка кариера со првиот настап на фолк фестивалот „Цветници 1992“ и првата негова песна „Полни, полни бре меанџио“.
„Со неговото појавување и неговите први хитови се поместија границите во македонската новосоздадена песна и се поставија нови стадарди во овој жарн на музика“, кажа Барбаровски кој заедно со Ванчо Тарабунов и текстописецот Огнен Неделковски од организаторите добија благодарници за долгогодишната соработка со Гоце Арнаудов.
За Тарабунов, Гоце со енергичниот, моќен глас што го имаше даде нов правец во пеењето кај македонските пејачи, а со неговите песни, од кои најголемите се сé уште хитови и уште многу ќе живеат кај народот се создаде едно големо фолклорно богатство за Македонија.
Гоце Арнаудов зад себе остави 200 песни, учествувал на стотина фестивали, од кои на преку 60 има добиено прво место. Пет години е прогласуван за најпопуларната личност на Македонија. Учествата на фестивалот Фолк Фест „Валандово“ му донеле 22 награди, а неговите песни многу пати ги имаат добиено наградите на публиката и на телевизискиот аудиториум.
Неколку пати станува сопственик на наградата за интерпретација на најголемиот пејач Никола Бадев на фестивалот „Гоце Фест“. Редовно и гостуваше на публиката во Европа, Америка и Австралија. Учествуваше редовно и на добротворни концерти.
Во 2000-та година во својот роден град Струмица, Гоце прави концерт на стадионот „Младост“ и собра 10.000 публика, а првите луѓе на градот му ја дават наградата „Свети Петнаесет Тивериополски свештеномаченици“ и за почесен граѓанин на Струмица.
